إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهُ وَنَعُوذُ ِباللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ. أَشْهَدُ أَن لاَّ إِلَهَ إِلاَّ الله وَحْدَهُ لَا شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. اَللَّهُمّ صَلِّ وَسَلِّمْ عَلَى مُحَمّدٍ وَعَلى آلِهِ وِأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْن

 أَمَّابَعْدُ؛ فَيَآ أَيُّهَا النَّاسُ، اُوْصِيْكُمْ وَاِيَّايَ بِتَقْوَى اللهِ وَطَاعَتِهِ لَعَلَّكُمْ تُفْلِحُوْنَ.كَمَا قَالَ تَعَالَى: يَا أَيُّهاَ الَّذِيْنَ ءَامَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ.  وَاعْلَمُوْا أَنَّ يَوْمَكُمْ هٰذَا يَوْمٌ عَظِيْمٌ، وَعِيْدٌ كَرِيْمٌ، أَحَلَّ اللهُ لَكُمْ فِيْهِ الطَّعَامَ، وَحَرَّمَ عَلَيْكُمْ فِيْهِ الصِّيَامَ، فَهُوَ يَوْمُ تَسْبِيْحٍ وَتَحْمِيْدٍ وَتَهْلِيْلٍ وَتَعْظِيْمٍ ، فَسَبِّحُوْا رَبَّكُمْ فِيْهِ وَعَظِّمُوْهُ وَتُوْبُوْا إِلَى اللهِ وَاسْتَغْفِرُوْهُ

الله اكبر الله اكبر لا اله الا الله  والله اكبر  الله اكبر ولله الحمد

Ma’asyiral muslimin, jamaah Shalat ‘Id rahimakumullah

Raos syukur saha pangalembana namung konjuk dhumateng Allah I, shalawat saha salam tansah katur dhumateng Nabi Agung Muhammad r. Mboten kesupen mangga tansah mbudidaya amrih mindakipun raos iman saha taqwa dhumateng Allah I.

Dereng kraos dangu lisan menika ngaturaken umbul donga dhumateng Allah, dereng dangu lisan menika ugi ngaturaken ta’min awit pandonga tiyang sanes, “duh gusti mugi paduka paring kawelasan kula saged panggih kalih wulan Ramadhan”. Ing dinten menika estu bilih ramadhan sampun purna gantos wulan candakipun, estu bilih ing sak lebeting wulan Ramadhan kathah perkawis perkawis endah ingkang sampun katindak-aken. Dinten dinten kapengker tansah ajeg maos ayat-ayat Al-Qur’an, ingkang damel manah menika ayom ayem, tentrem kepara ngantos netes luh ing suwasana khusyu’

Dinten dinten kapengker ugi kanhti ajeg nindak-aken shalat jamaah wontening dimasjid, kathah sedekah, kathah dzikir saha ngaturaken pamuji pandonga dhumateng Allah I. ewa semanten menawi mboten dipun jagi, estu sedaya kala wau namung badhe dados peng-angen angen endah lajeng saged ical. Kepara ing dinten dinten kapengker kathah tiyang ingkang sregep tindak jamaah gangsal wekdal, lajeng setunggal kalih sami nilar jejibahan jamaah wonten masjid menika. Kalebet ingkang ing wulan Ramadhan menika dados tiyang ingkang dermawan, lajeng badhe wangsul malih dados tiyang ingkang bakhil, mboten purun ngedalaken sahadaqah malih.

Estu eman menawi ruh saha semangat ngibadah, shadaqah saha pengibadahan ing wulan Ramadhan mboten paring atsar ing piyambak-ipun.

رَغِمَ أَنْفُ عَبْدٍ دَخَلَ عَلَيْهِ رَمَضَانُ فَلَمْ يُغْفَرْ لَهُ،

       Jawinupun, “duh cilaka mencit wong wong kang tekane ramadhan,nganti enteke kanggo deweke, babar blas ora ana dedosan kang diapura” (HR. Ahmad)

       Tiyang tiyang ingkang kasebat ing hadits menika estu tetiyang ingkang kapitunan. Amargi piyambake mboten saged ngisi kepara lajeng nglirwake hadiripun Ramadhan, satemah mbenjang ramadhan badhe nyuwun pengadilan ing ngarsa dalem Allah I. Ramadhan kagem piyambake namung dados topeng kangge nutupi kemunafikan saha tingkah awon, pramila sak mangke badhe kewiyak sak sampunipun topeng kasebat dipun copot ketingal wajah aslinipun. Menawi tiyang kasebat remen ing maksiyat saha tumindak awon, sedaya estu badhe kewiyak, sedaya badhe ketingal.

Mugi mugi Allah I tansah paring sih rahmat pangapunten saha tansah nampi sedaya amal ibadah kula lan penjenengan. Aamiin.

اللهُ أَكْبَرُ، اللهُ أَكْبَرُ، اللهُ أَكْبَرُ وَللهِ الحَمْدُ

Ma’asyiral muslimin, jamaah Shalat ’Id rahimakumullah

Wonten ing al-Qur’an, Allah I paring kabar wonten satunggaling negeri ingkang berkah, dikenal Ing sak lebeting al-Qur’an, Allah I paring khabar bilih saweneh tlatah ingkang keparingan berkah, kanthi sebatan Baldatun Thayyibatun wa Rabbun Ghafur. Allah I sampun ngendika,

لَقَدۡ كَانَ لِسَبَإٖ فِي مَسۡكَنِهِمۡ ءَايَةٞۖ جَنَّتَانِ عَن يَمِينٖ وَشِمَالٖۖ كُلُواْ مِن رِّزۡقِ رَبِّكُمۡ وَٱشۡكُرُواْ لَهُۥۚ بَلۡدَةٞ طَيِّبَةٞ وَرَبٌّ غَفُورٞ 

Jawinipun. Sak temene kanggo kaum Saba ana tanda (kekuasaane Pengeran) ing tlatah wong wong iku, yaiku anane kebon woh wohan ana ing kanan saha kering (kanggo wong wong iku didhawuhi ): padha mangan-a sira seka rizki kang wus Ingsun paringke, mbanjur padha ngaturna syukur sira kabeh marang Allah. (Negerimu) iku minangka negeri kang apik lan (Pengeranmu) hiya pengeran kang maha maringi pangapura (Qs. Saba :15)

Dipun aturaken bilih kala semanten Saba’ menika minangka tlatah utawi negeri ingkang subur saha makmur. Hal menika katitik saking tuwuh kanthi subur saha ngrembaka sae tetaneman woh wohan ingkang linangkung kathah, ugi bilih woh wohan kasebat linangkung eca saha sae menawi kabandingaken kalih tetuwuhan ing sanes tlatah ing ngalam donya menika. Dipun aturaken ugi sinten kemawon ingkang tindak ing tlatah/ Negeri Saba’ mboten badhe kraos sayah, ngorong saha luwe, amargi menawi badhe dahar sampun cemawis saged metik ing sak kanan kering-ing  margi.  Satemah tebih saha awrat menika mboten kraos, sedaya kadesdene namung celak saha mboten awrat.

Sedaya menika estu keberkahan ingkang linangkung edi peni saking  Allah I tumanduk ing tlatah/Negeri Saba’, sedaya kala wau inggih amargi penduduk-ipun tansah  tunduk saha patuh ing sak lebeting nindak-aken sedaya dhawuh-ipun Allah I, tebih saking lampah syirik saha zhalim, kalebet ugi tansah syukur dhumateng  nikmat yang Allah I awit sedaya peparing-ipun.

Ananging rikala penduduk-ipun  lajeng mlengos saking ketaatan saha peribadatan dhumateng Allah I kepara ugi mboten purun syukur dhumateng Allah, mila lajeng keberkahan negeri Saba’ dipun gantos petaka arupi banjir bandang ingkang damel risak saha kapitunan ing negeri saba’ Allah I sampun paring dhawuh mekaten,

فَأَعۡرَضُواْ فَأَرۡسَلۡنَا عَلَيۡهِمۡ سَيۡلَ ٱلۡعَرِمِ وَبَدَّلۡنَٰهُم بِجَنَّتَيۡهِمۡ جَنَّتَيۡنِ ذَوَاتَيۡ أُكُلٍ خَمۡطٖ وَأَثۡلٖ وَشَيۡءٖ مِّن سِدۡرٖ قَلِيلٖ 

Jawinipun, amarga wong wong iku padha mlengos, nuli Ingsun ngutus banjir bandang lan Ingsun ganti kebun woh wohan iku kebon kang thukul wit witan kang wohe pahit, wit atsl lan sithik seko wit Sidr (Qs. Saba :16)

Owah gingsir kahanan kanthi cepet saha damel kaget kalebet mboten wonten raos ayom ayem malih, kahanan menika dipun tambah awit kathah tikus ingkang bendungan, kados ingkang kasebat dening Ibnu Katsir. Ugi mboten wonten tetuwuhan ingkang mrajak, kejawi tetuwuhan ingkang mboten dipun betahaken, ugi mboten saged dipun pendhet manfaat.

اللهُ أَكْبَرُ، اللهُ أَكْبَرُ، اللهُ أَكْبَرُ وَللهِ الحَمْدُ

Ma’asyiral muslimin, jamaah Shalat ’Id rahimakumullah

Kirang langkung ing abad kaping 11 Masehi, Andalusia kalebet tlatah ingkang luhur saha misuwur ing Eropa. Wekdal kala semanten negeri Andalusia kagungan  pemimpin ingkang ‘alim, shalih, adil, saha amanah, mimpin kanthi wekdal ingkang linangkung dangu inggih  50 (seket) tahun. Inggih panjenenganipun Abdurrahman bin An Nashir.

Ing zaman kepemerintahan Abdurrahman bin An Nashir, Ibukota Andalusia (Cordoba) dados pusat para ‘alim para intelektual ingkang estu estu wigatos ing kukuban Eropa Barat. Panjenengane ugi paring tambah wiyar perpustakaan kota, ingkang ing tembe ugi dipun kemonah saha dipun tambah dening para pangreh praja sak lajengipun. Pramila dipun aturaken bilih ing Cordoba wekdal kala semanten sampun wonten 3.000 Masjid saha 100.000 toko saha bale griya sak laminipun reh praja panjenenganipun. Inggih Pemimpin menika ingkang mbekta  Andalusia tumuju ing kemakmuran, saha dados pusat peradaban ing Eropa kala wekdal semanten. Kalebet ugi dados pusat ilmu pengetahuan, kanthi Cordoba dados ibu kotanipun.

Minangka  pemimpin ingkang ‘alim, estu panjenengane ugi damel pemimpin sak ngandapipun ugi pemimpin ingkang linangkung, ingkang ugi tansah paring hormat dhumateng para ulama. Saweneh tiyang ingkang ahli ilmu saha ikhlas, mboten ajrih kejawi namung dhumateng Allah,  piyantun ingka ng dipun maksud inggih menika Qadhi Mundzir bin Sa’id.

Qadhi Mundzir paring piwucal ingkang linangkung edi peni inggih menika, “umpama kabeh pemimpin ing bumi iki padha khusyu’ lan tunduk patuh marang Dzat  kang Kagungan langit, tur ora gumede, mesthi Allah Kang kagungan  langit bakal arep  nurun-ake sih rahmat-Ipun.”

Mila saking menika estu mboten namung amargi keshalihan pemimpin-ipun, ingkang saged njalari turunipun sih rahmat dalem Allah I, ananging ugi amargi estu estu   Qadhi Mundzir bin Sa’id, minangka ulama shalih ingkang ngawal raos keadilan ing tlatah negeri kanthi estu estu. Mboten wantun lelahanan hukum, datheng sinten kemawon kalebet dhateng Khalifah. Kangge jejeging hukum estu adil mboten tebang pilih hukum, utawi landhep ing ngandhap lajeng kethul ing nginggil. Piyantun kados  Qadhi Mundzir menika ingkang dipun pilih Khalifah Abdurrahman An Nashir kangge nyengkuyung raos keadilan ing tlatah Negeri Andalusia.

اللهُ أَكْبَرُ، اللهُ أَكْبَرُ، اللهُ أَكْبَرُ وَللهِ الحَمْدُ

Ma’asyiral muslimin, jamaah Shalat ’Id rahimakumullah

Mekaten ugi bangsa Indonesia ingkang nembe kagungan hajatan nasional arupi “Pemilu” kangge milih Presiden, DPD,  saha DPR. Pramila dipun aturaken  nasehat mekaten,

Dhumateng sinten kemawon ingkang angsal amanah kagem mimpin saha ngemonah negeri menika, wiwit saking  tingkat pusat dumugi tingkat daerah, kalebet Presiden, Wakil Presiden, Anggota DPR, Gubernur, Bupati, Camat, Lurah, Dukuh, RT, dhumateng sedaya aparatur peradilan saha keamanan, mangga dados  pemimpin ingkang adil, shalih, tunduk, saha ajrih dhumateng Allah, mangga tansah  parek dhateng ulama, saha nyuwun supados dados  penasehat ing paring solusi maneka warni permasalahan umat.

Tunaikanlah amanah ngatur negeri menika kanthi raos ajrih dhumateng Allah. Sampun ngantos nindak-aken lampah zhalim sekedhik kemawon, amargi badhe dados pepeteng ingkang matumpa tumpa benjang ing dinten  kiamat. Mangga kita penggalih kanthi estu estu pengendikanipun gusti Allah I menika,

وَلَا تَحْسَبَنَّ اللهَ غَافِلًا عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ

Jawinipun, “Lan aja pisan pisan sliramu duwe panyana yen Allah bakal lali marang apa wae kang wes di lakoni wong wong kang zhalim. Temen Allah hamung ngulur wektu kanggo wong wong iku tumeka dina kang wong wong iku bakal padha kewiyak lan pandangan matane padha terbelalak.” (QS. Ibrahim: 42)

Katur dhumateng sedaya generasi muda, sampun ngantos lena awit raga ingkang taksih pideksa, paningal ingkang taksih cetha, kulit taksih sampurna, saha akal fikiran ingkang taksih tansah emut, sedaya ingkang kasebat kalawau mboten saged dados jaminan, bilih lelampahan ing ngalam donya menika taksih dangu. Amargi sepuh menapa taksih wiranem menika sami kedudukanipun menawi sampun aben ajeng kalih pupusing yuswa. Mangga dipun gemeni wekdal taksih muda, jasmani taksih bergas waras, kangge pados sukses ing donya ugi sukses ing akhirat.

Katur dhumateng para muslimah ingkang minulya, bilih kaum wanita menika   dados pilar utami ing madyaning masyarakat. Estu bilih  kaum wanita badhe saged dados pilar utami, menawi tansah ngugemi ing  fitrah-ipun, kados ingkang sampun kadhawuhaken miderek Allah saha Utusan-ipun.  Dumugi dinten menika, Indonesia kanthi harapan ingkang inggil, taksih nengga rawuh penjenengan sedaya, para wanita sejati, ingkang tansah paring asih asuh saha nggulawentah lare lare kanthi asih tresna, ingkang purun sinau ngantos bantas kangge dados ibu ingkang cerdas, saha bijak kangge putra-putrinipun.

Katur dhumateng sedaya kaum muslimin wal muslimat, mangga tansah dados piyantun piyantun ingkang   shalih salhihah, amargi kanthi keshalihan masyarakat ing wewengkon setunggal negeri, insyaallah gusti Allah badhe paring berkah saking langit saha saking bumi.

وَلَوۡ أَنَّ أَهۡلَ ٱلۡقُرَىٰٓ ءَامَنُواْ وَٱتَّقَوۡاْ لَفَتَحۡنَا عَلَيۡهِم بَرَكَٰتٖ مِّنَ ٱلسَّمَآءِ وَٱلۡأَرۡضِ وَلَٰكِن كَذَّبُواْ فَأَخَذۡنَٰهُم بِمَا كَانُواْ يَكۡسِبُونَ  ٩٦

Jawinipun, menawa  sekirane wong wong  penduduk negeri-negeri iku padha iman saha takwa,mesthi Ingsun bakal paring marang wong wong mau  berkah seka langit lan bumi, ananging wong wong iku padha nggorohake ayat ayat Ingsun, mula nuli Ingsun siksa wong wong iku amarga pokal gawene dewe. (QS Al-A’raf : 96)

اللهُ أَكْبَرُ، اللهُ أَكْبَرُ، اللهُ أَكْبَرُ وَللهِ الحَمْدُ

Ma’asyiral muslimin, jamaah Shalat ’Id rahimakumullah

Ing wusana khutbah menika, mangga kanthi sikap khusyu’ tawadhu’ kanthi pasrah jiwa saha raga dhumateng Allah mugi Allah kepareng ijabah

إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ يَا أَيُّهَا الَّذِيْنَ آمَنُوْا صَلُّوْا عَلَيْهِ وَسَلِّمُوْا تَسْلِيْمًا  .اللهُمَّ اغْفِرْ لِلْمُؤْمِنِيْنَ وَالْمُؤْمِنَاتِ، وَالْمُسْلِمِيْنَ وَالْمُسْلِمَاتِ، الأَحْيَاءِ مِنْهُمْ وَالأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدَّعْوَاتِ، فَيَاقَاضِيَ اْلحَاجَاتِ. اللهُمَّ إِنَّا نَسْأَلُكَ الْهُدَى وَالتُّقَى وَالعَفَافَ وَالغِنَى. اللهُمَّ إِنَّا نَحْمَدُكَ بِأَنَّكَ أَهْلٌ أَنْ تُحْمَد وَنَشْكُرُكَ بِأَنَّكَ أَهْلٌ أَنْ تُشْكَر وَنُثْنِيْ عَلَيْكَ الْخَيْرَ كُلَّهُ فَإِنَّكَ أَنْتَ أَهْلُ الْمَجْدِ وَالثَّناَءِ ،رَبَّناَ ظَلَمْناَ أَنْفُسَناَ ظُلْماً كَثِيْراَ وَإِنَّهُ لاَ يَغْفِرُ الذُّنُوْبَ إِلاَّ أَنْتَ فَاغْفِرْ لَناَ مَغْفِرَةً مِنْ عِنْدِكَ وَارْحَمْناَ إِنَّكَ أَنْتَ الْغَفُوْرُ الرَحِيْم

Ya Allah, namung paduka ingkang ngripta sedata mahluq, saha namung paduka ingkang hak dipun sembahllah kula sedaya nyuwun dhumateng paduka, mugi Paduka kersa ngapunten sedaya dosa dosa menika Ya Allah, mugi paduka paring sih kawelasan mugi  kula sedaya, saged mungkasi gesang menika kanthi husnul khatimah.

Ya Allah, ya Rabbana, mugi paduka paring sih nugraha kekiyatan, satemah kula sedaya menika saged birrul walidain

Ya Allah, ampunilah dosa dosa kula sedaya menika, ampuni ya Allah , ampuni ya Allah sedaya kekhilafan saha dosa tiyang sepuh kula sedaya menika…

Ya Allah, ya Rabbana, mugi paduka paring kekiyatan, mugi kula sedaya menika saged dados tiyang sepuh ingkang saged nggula-wenthah sedaya dzuriyah, kalebet dzuriyah ingkang salih saha salihah. Namung paduka ya Allah ingkang saged paring kekiyatan saha mangunah kanthi sak sae saenipun

 Ya Allah, mugi paduka paring sih nugraha kawelasan anak turun kula sedaya menika, dados dzuriyah ingkang damel ayom ayem ing manah, saha tansah umbul donga rikala kula sedaya menika sampun mlebet ing ngalam kubur… Ya Allah, mugi paduka paring sih rahmat nugraha datheng   sedaya dzuriyah kula sedaya menika, minangka dzuriyah ingkang tansah remen saha tansah gegondelan ing pustaka suci al-Qur’an saha tansah gegesang  Sunnah sunnah  Nabi…

اللهم إِنِّي أَعُوْذُ بِكَ مِنَ إِمَارَةِ الصِّبْيَانِ وَالسُّفَهَاء

“Yaa Allah, estu kula sedaya nyuwun reksa dhumateng paduka, saking pemimpin ingkang dereng dewasa saha pemimpin ingkang bodo.

اللهُمَّ لَا تُسَلِّطْ عَلَيْنَا بِذُنُوْبِنَا مَنْ لَا يَخَافُكَ فِيْنَا وَلَا يَرْحَمُنَا

“Ya Allah, – amargi kathahing dosa-dosa kula sedaya- sampun ngantos paduka paring pemimpin ingkang mboten ajrih dhumateng paduka, saha mboten welas asih dhateng kula sedaya.

اَللَّهُمَّ أَصْلِحْ وُلَاةَ أُمُوْرِنَا، اَللَّهُمَّ وَفِّقْهُمْ لِمَا فِيْهِ صَلَاحُهُمْ وَصَلَاحُ اْلإِسْلَامِ وَالْمُسْلِمِيْنَ، اَللَّهُمَّ أَعِنْهُمْ عَلَى الْقِيَامِ بِمَهَامِهِمْ كَمَا أَمَرْتَهُمْ يَا رَبَّ الْعَالَمِيْنَ. اَللَّهُمَّ أَبْعِدْ عَنْهُمْ بِطَانَةَ السُّوْءِ وَالْمُفْسِدِيْنَ وَقَرِّبْ إِلَيْهِمْ أَهْلَ الْخَيْرِ وَالنَّاصِحِيْنَ يَا رَبَّ الْعَالَمِيْنَ اَللَّهُمَّ أَصْلِحْ وُلَاةَ أُمُوْرِ الْمُسْلِمِيْنَ فِيْ كُلِّ مَكَانٍ

Ya Allah, mugi paduka paring pemimpin ingkang sae, pemimpin ingkang tansah  angsal taufik, satemah saged nindak-aken jejibahan kanthi sae, Ya Allah, Ya Allah, mugi paduka dadosaken pemimpin kaum muslimin menika, piyantun piyantun ingkang sae, ing wekdal saha papan pundi kemawon

Ya Allah mugi paduka paring kawilujengan dateng sederek sederek kaum muslimin muslimat ing Gaza Palestina, Ya Allah mugi paduka paring sih rahmat saha kawelasan, mugi saged miyos saking isolasi saha kahanan ingkang rupeg wekdal sak menika”. 

Ya Allah mugi paduka tansah nampi para syuhada, saha paring sembuh ingkang nembe nandang gerah.

Ya Allah mugi paduka paring mangunah dhumateng sedaya muslimin muslimat ing Gaza Palestina, Ya Allah, mugi paduka paring mangunah saha kekiyatan kangge ngadepi kaum Yahudi saha kaum kuffar lan kaum  munafiq

Ya Allah, Zat ingkang Maha paring ijabah, mugi paduka paring  kabul sedaya pinyuwunan kula sedaya menika, aamiin aamiin aamiin

رَبَّناَ لاَ تُزِغْ قُلُوْبَناَ بَعْدَ إِذْ هَدَيْتَناَ وَهَبْ لَناَ مِنْ لَدُنْكَ رَحْمَةً إِنَّكَ أَنْتَ الْوَهَّابُ. رَبَّنَا اَتِنَا فِى الدُّنْيَا حَسَنَةً وَفِى الأَخِرَةِ حَسَنَةً وَقِنَا عَذَابَ النَّارِ، سُبْحَانَ رَبِّكَ رَبِّ الْعِزَّةِ عَمَّا يَصِفُوْنَ وَسَلاَمٌ عَلَى اْلمُرْسَلِيْنَ وَاْلحَمْدُ للهِ رَبِّ اْلعَالَمِيْنَ ، وَصَلَّى اللهُ وَسَلَّمَ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِيْنَ .

Dening : Ustadz R Joko Winarno.

Naskah Lengkap bisa di download disini

Silakan gabung Group WhatsApp